Isa ang patay kag pito ka tawo ang missing matapos nga nagtibusok ang duha ka military helicopters sang Japan.
Suno kay Japanese Defense Minister Minoru Kihara, nakit-an sang rescuers ang parte sang aircraft sa dagat, kag ginapatihan nga nagbungguanay ang duha ka helicopters antes ini nag-crash.
Gina-imbestigaran pa ang rason sang insidente ilabi na ang flight recorders nga na-retrieve sang ministry, apang ang ginahatagan prayoridad subong amo ang pagsalbar sa mga missing.
Suno pa sa opisyal, nagapatigayon sang drills ang duha ka helicopters agud nga ma-counter ang submarines sa gab-i. Ginalantaw man nga natabo ang pagtibusok sa night-time training sa Izu islands sa Pacific.
Nadula ang komunikasyon sa isa ka chopper 10:38 sang gab-i sang Sabado sa isla sang Torishima kag sunod nga may napadala nga emergency signal halin sa aircraft. 25 minutos ang nakaligad, nareyalisar sang militar nga nadula man ang komunikasyon sang isa pa ka aircraft sa amo man nga area sang kadagatan.
Ginkumpirma naman sang Navy nga wala na sang aircraft ukon iban pa nga barko sa amo nga area kag wala man sang nakit-an nga involvement ang iban nga pungsod.#
Photo is from ABC Express
