Naglab-ot sa 101 ka balay kag estruktura ang una nga na-assess nga nahalitan sa nagluntad nga ginapatihan “buhawi” sa pila ka lugar sa syudad sang Iloilo sang damlag lang.
Suno sa Iloilo City Emergency Operations Center, na-record ang insidente pasado alas-10:30 sang gab-i sang Agosto 8, nga nakaapekto sa 12 ka mga barangay sa distrito sang Jaro, La Paz kag Mandurriao.
Sa kabug-usan, 148 ka pamilya ukon 587 ka indibidwal ang naapektuhan sang insidente, samtang 71 ka pamilya ukon 256 ka indibidwal ang temporaryo nga yara sa evacuation centers.
Sa initial nga assessment, 4 ka balay ang totally damaged kag 97 ka balay ang partially damaged kun sa diin kabug-usan nga 101 ka damaged houses tanan ang na-record.
Sa distrito sang Jaro, kabug-usan nga 68 tanan ka mga damaged houses ang naapektuhan.
Sa distrito naman sang La Paz, isa ka balay ang na-report nga naguba sa Brgy. Gustilo.
Samtang, sa distrito sang Mandurriao, naglab-ot naman sa 23 tanan ka mga balay ang na-apektuhan.
Ginklaro man sang talatapan nga ang initial assessment sa damaged houses gina-validate pa sang City Social Welfare and Development Office (CSWDO).
Posible pa nga magbag-o ang rekord kung magapadayon pa ang paglaslas sang mabaskog nga hanging habagat nga dala sang Typhoon Dolphin.
Nahibaluan nga naka-record man ang Iloilo City Emergency Operations Center sang 12 tanan ka insidente nga nagalakip sang mga uprooted trees, natumba nga poste kag debris bangud sang mabaskog nga hangin.
