Arestado ang 11 ka Chinese nationals nga naga-trabaho sa iligal nga minahan sa Barangay Tugos sa Paracale, Camarines Norte.
Ang nagdakop amo ang mga opisyal sang Bureau of Immigration (BI), Presidential Anti-Organized Crime Commission (PAOCC), Armed Forces of the Philippines (AFP), kag ang Philippine National Police (PNP) matapos nga ginpahibalo sila sang gobernador sang probinsya.
Suno sa PAOCC, may gina-uyatan ang kumpaniya nga environmental compliance certificate (ECC) agud nga maka-operate apang lapaw na ang ila pagtinir sa coverage sang lisensya.
Ginpahayag ni PAOCC spokesperson Winston Casio nga isa na ini ka maathag nga paglapas sa environmental compliance certificate kag may yara man sila sang salabton sa criminal nga aspeto ilabi na bangud indi small-scale mining ang ila ginahimo kundi open pit large-scale mining.
Sang gin-check ang area, nakit-an man nga daw sa wala lang ang mga Chinese workers bangud wala man sila sang ginasuksok nga protective equipment kag daw pangtulog lang ang bayo.
Ipatigayon subong nga adlaw, Oktubre 14, ang inquest sa immigration violations kag natalana man nga ipasaka ang reklamo nga paglapas sa Philippine Mining Act and the Clean Water Act.
