Gin-athag sang Malacañang Palace nga ang pag-deklarar ni President Ferdinand Marcos Jr. sang State of National Energy Emergency ang pamatuod nga wala nagapabaya ang gobyerno sa tunga sang ginpangatubang nga global crisis sa produktong petrolyo.
Suno kay Palace Press Officer Undersecretary Atty. Claire Castro, ginpatuman ini nga tikang agud mapahagan-hagan kag mapunggan ang paglala sang sitwasyon sa pungsod bangod sang padayon nga kinagamo sa Middle East.
Ginpahayag sang opisyal nga katuyuan sang administrasyon nga mangin madasig ang paghatag sang mga solusyon antes paman maglab-ot ang pungsod sa isa ka “indi maayo nga sitwasyon.”
Sa idalom sang sini nga deklarasyon, ginahatagan sang gahom ang gobyerno nga padasigon ang pagkuha sang alternatibo nga suplay sang langis kag maghatag sang mga subsidiya para sa mga apektado nga sektor agud masiguro ang seguridad sang enerhiya sang pungsod tubtob matapos ang ginapangatubang nga krisis.
