ILOILO CITY- Nagsugod na subong nga adlaw ang isa ka semana nga selebrasyon sang Iloilo Science and Technology University may kaangtanan sa ika-119 nga founding anniversary sang unibersidad.
Sa interview sang Bombo Radyo kay Dr. Gabriel M. Salistre, Jr., presidente sang ISAT-U, iya ginpahayag nga ang tema sang selebrasyon subong nga tuig amo ang “Forging Sustainable Futures Through Future- Ready Education.
Suno sa iya, ang tema nagakahulugan sang commitment sang unibersidad nga magdul-ong sang de-kalidad nga edukasyon sa mga estudyante.
Pahayag niya, ini indi lamang agud maka-produce sang top-notchers sa mga pasinawan kundi mga professionals sa nagkalain-lain nga patag.
Ginapadayaw man ni Dr. Salistre ang partnership sini sa komunidad kag sa nanuhay-tuhay nga organisasyon, lokal man ukon sa luwas sang pungsod.
Ginhalimbawa man sini ang natukod nga relasyon sang ila unibersidad sa Florete Group of Companies kag sa Bombo Radyo Philippines.
Nahibaluan nga ang ISAT-U amo ang venue sang mga programa sang network kag isa na diri ang Dugong Bombo nga patigayunon sa palaabuton nga Nobyembre.
