ILOILO – Naglab-ot sa dose ka mga balay ang ginlamon sang kalayo sang nagluntad ang sunog sa Brgy. Baybay Norte, Miagao, Iloilo subong nga adlaw, Mayo 11.
Sa interview sang Bombo Radyo kay Punong Barangay Efren Balsicas Jr., iya ginpahayag nga ang nagapanag-iya sang natupok nga mga balay amo ang mga masunod:
1. Reynaldo Siasol
2. Mary Jane Palmos
3. Former Brgy. Kagawad Welforo Dalisay
4. Pepe Severino Jr
5. Pepe Severino Sr.
6. Ronnie Severino
7. Joebert Sapan
8. Rosie Morit
9. Romar Petiza
10. Queen Marie Siasol
Magluwas sa naupos nga mga balay, duha man ka balay ang nakaangkon sang partial nga mga halit.
Ang duha ka balay suno kay Balsicas ang ginapanag-iyahan nanday Terso Morana kag Lourdes Palmos.
Sa kabug-usan, suno sa punong barangay, 16 ka pamilya ang apektado.
Suno pa kay Balsicas, santo man sa imbestigasyon sang Bureau of Fire Protection (BFP) kag sang mga natungdan, ang sunog ang nag-umpisa sa balay ni Pepe Severino Sr.
Ginapahayag nga daan nga wiring nga nagasablag sa kisame ang rason kun ngaa nagluntad ang nasambit nga insidente.
Nahibaluan nga nag-augment man ang fire officers halin sa banwa sang San Joaquin kag Guimbal, apang bangud sang mabaskog nga hangin kag mga balay nga kalabanan human sa light materials, madasig nga naglapta ang kalayo.
Wala sang may nasamaran kag napatay, apang pahayag sang punong barangay, base sa iya assessment, masobra P500,000 ang halit sang amo nga sunog.
Ang pamilya Severino suno kay Balsicas ang temporaryo nga nagatinir sa ila kamalig, samtang ang iban naman ang ginhinakop sang ila iban nga mga himata sa Miag-ao.
Gilayon man nga naghatag sang relief assistance ang Municipal Social Welfare and Develoment Office (MSWDO) apang suno kay Balsicas, sa mga luyag magdonar sang kinahanglanon sang mga biktima, magpakig-angot lang sa mga opisyal sa ila barangay.
