Hugot nga ginpanginwala sang National Bureau of Investigation nga sila ang sa likod sang operasyon sa Senado may kaangtanan sa ginapatihan nga pag-aresto kay Sen. Ronald dela Rosa sa tunga sang tensyon kag sunod-sunod nga lupok sang pusil kagab-i.
Ginpahayag ini ni NBI Director Melvin Matibag matapos ginkumpirma sini nga wala siya nagkadto sa Senado matapos sila ginsugo sang mga senador.
Gin-athag man sang opisyal nga wala sang ahente sang NBI nga ato sa sulod sang Senado sang natabo ang insidente.
Suno sa iya, ginpangabay lamang ang ila presensya agud usisaon ang seguridad sa palibot sang Senate building.
Dugang pa ni Matibag, nakabaton siya sang tawag halin kay Sen. Loren Legarda may kaangtanan sa presensya sang armado nga mga ahente sang NBI sa Senado, apang ginpanginwala ini sang opisyal.
Gin-athag man sang NBI chief nga wala sila sang may ginpagguwa nga mando para arestuhon si Dela Rosa kag suno pa sa iya nga “100 percent” nga wala sang operasyon ang NBI sa Senado kagab-i, Mayo 13.
Samtang, ginkumpirma man ni NBI Director Melvin Matibag nga wala sang may nasamaran sa nasambit nga insidente.
Ginpasiguro man ni NBI Director Matibag nga magapatiagyon sila sa National Bureau of Investigation sang imbestigasyon kaangot sa insidente nga natabo kagab-i kun sa diin may linupok sang pusil ang nabatian.
