TIGBAUAN, ILOILO – Kasubong nga nakapamilin-bilin pa ang 16 anyos nga dalagita antes naghikog sa Barangay 8, Tigbauan, Iloilo.
Sa interview sang Bombo Radyo kay Rogen Tubola, 19 anyos nga kahagugma sang biktima, iya ginpahayag nga magka-upod pa sila sang iya nobya sa kwarto isa ka adlaw antes ang suicide incident.
Suno kay Tubola, nagapabati-bati na nga daan ang biktima nga nakapoy na kag indi na maka-agwanta apang wala naman nagasabat kun pamangkuton tuhoy sa iya problema.
Sang kaagahon sang adlaw nga natabo ang insidente, nakita pa niya ang biktima nga nagguwa sa kwarto rason nga iya ini ginsundan apang sang nakabalik na siya sa kwarto, nakita niya nga nagasandig sa dingding ang nobya samtang nagakuom sang kamot.
Bangud nga may yara siya sang trabaho pagka-aga, gindul-ong pa siya sang nobya sa banwa kag padayon ang ila nga pagbayluhanay sang mensahe kag laragway sa chat.
Ginabanta 5:00 na sang hapon kadungan sang iya nga pagpauli, didto na niya nahibalu-an ang tuhoy sa insidente kag nadumduman niya nga magpa-load.
Didto na niya nakita ang mga laragway nga ginpadala sang biktima sa chat nga nagapatimaan sang iya nga paghikog.
Ginpahayag ni Tubula nga kun may yara kun tani siya sang data kag nakita gilayon ang mga laragway, mahimo nga napunggan pa niya ang biktima.
Ginkakibot naman sang lola nga si Beberlina Tondo ang natabo sa iya 16 anyos nga apo.
Suno kay Tondo, antes pa man ang insidente, naglisensya pa sa iya ang biktima nga manglaba sang mga lago nga bayo.
Ginpahayag ni Tondo nga wala man niya ginhatagan sang igtalupangod ang iya apo nga masami man lang nga nagapabukot sa kwarto.
Sang hapon na, ginpahayag sang lola nga iya kun tani sugu-on nga mamubod sang manok ang biktima apang wala sang may nagasabat sang siya ang nagpanuktok sa pwertahan.
Sang nabuksan na ang pwertahan, ginpahayag sang natungdan nga nakita na lang niya nga nagabitay na ang apo gamit ang lubid kun sa diin mainit pa ang bangkay sang ini ang nasapwan.
Ginhingagaw pa dala sa hospital ang biktima apang gindeklarar nga dead on arrival.
Indi pa case closed para sa otoridad ang pagpangusisa sa natabo nga suicide incident sa Barangay 8, Tigbauan, Iloilo.
Ini ang kasunod sang pahayag sang pamilya nga indi na pag-ipaidalom sa autopsy examination ang bangkay sang 16 anyos nga dalagita.
Sa interview sang Bombo Radyo kay Police Major Rolando Araño, hepe sang Tigbauan Municipal Police Station, iya ginpahayag nga lunsay nagasanto ang tanan nga sirkumstansya tuhoy sa natabo nga insidente.
Suno kay Araño, lakip sa mga natipon nga ebidensya tuhoy sa nasambit nga suicide incident amo ang mensahe nga ginpadala sang biktima sa 19 anyos nga kahagugma kag sa iloy sang lalaki.
Sa pagpaathag ni Araño, kumpirmado nga ang nasambit nga mga mensahe ang naghalin sa number sang biktima apang tubtub subong indi pa mabuksan ang cellphone bangud nga may yara ini sang password.
Magluwas diri suno kay Araño, ginapahayag nga may yara sang depresyon ang biktima santo sa assessment sang medical expert nga iya ginpakig-angutan.
Ginpahayag man sang hepe nga malayo ang anggulo nga may yara sang foul play bangud mismo ang iloy ang nagapanindugan nga yara siya sa ila balay sang tion nga nagbitay ang iya anak kag wala man sang palatandaan nga ginpwersa ang dalagita.
Kun lantawon ang balayan kun sa diin nagbitay ang biktima gamit ang lubid, ginpahayag sang natungdan nga mahimo ini nga malab-ot paagi sa pagtungtong sang plastic chair sa hiligdaan.
