Nagpangibabaw ang tiglawas sang Quezon City nga si Asia Rose Simpson sa Miss World Philippines 2026.
Ginkoronahan siya nanday Miss World Philippines 2024 Krishnah Gravidez kag Miss World 2025 Opal Suchata Chuangsri sa Mall of Asia Arena.
Pasado na alas dos kaina sang kaagahon sang natapos ang pageant.
Nalapawan ni Simpson ang performance sang 23 ka iban pa nga aspirants halin sa Pilipinas kag sa overseas Filipino communities.
Isa man siya sa pinakabata nga contestants sa edad nga 17-anyos. Nadag-an sini ang search sa Miss World Philippines-Quezon City sang nagligad nga tuig. Sang 2023, nag-compete siya bilang tiglawas sang New Mexico sa Miss Teen USA pageant kun sa diin ginkilala siya bilang Miss Congeniality.
Magluwas sa Miss World Philippines title, nakuha man ni Asia Rose ang pila ka special awards lakip na ang Talent Challenge winner kag Beauty with a Purpose. Sa iya kag kay Valerie Pawid West sang Ifugao nagkadto ang Best in Swimsuit award.
Sa pihak nga bahin, ginhingadlan naman si Anne De Mesa sang Manila bilang First Princess kag si Gabriel Fuentes Galapia sang Pampanga bilang Second Princess.
Nahibaluan nga si Megan Young pa lamang ang isahanon nga beauty queen sang Pilipinas nga nakadaog sang titulo sa Miss World. Nadag-an sini ang korona sang 2013.#
