ILOILO CITY- Arestado sang Iloilo Provincial Bantay Dagat Task Force ang 17 ka mga iligal nga manugpangisda sa kadagatan sang Sitio Piagao, Barangay Granada, Carles, Iloilo.
Sa interview sang Bombo Radyo kay Police Col. Ronaldo Palomo, Provincial Director sang Police Provincial Office, iya ginpahayag nga sakay ang mga illegal fishers sa F/B Joshua 1 sang nadakpan sang task force nga nagapatigayon sang seaborne operation.
Suno kay Palomo, isa sa mga nadakpan amo ang boat captain nga si Ronald Garcia, 33 anyos, kaupod ang 16 ka mga crew nga lunsay tumandok sang Brgy. Tabogon, Carles, Iloilo.
Na-recover sa sakayan ang nagkalain-lain nga fishing paraphernalia.
Nakumpiska naman ang 10 ka banyera sang isda kag ginhatag sa government hospital kag charitable institution.
