ILOILO – Duha ang patay matapos ang ginpatigayon nga fogging sa Brgy. San Pedro, Molo, Iloilo City.
Ang duha ka biktima ang ginkilala sanday Cherry Lyn Adelante, 32, kasado kag ang isa ka tuig nga lapsag.
Sa interview sang Bombo Radyo kay Daisy Ponce, iloy ni Cherry Lyn, iya ginpahayag nga nakabatyag sang pagpin-ot sang dughan kag nahapo ang iya nga bata matapos nakahaklo sang aso gikan sa fogging.
Suno kay Ponce, wala sila napahibalo nga may yara sang ginpatigayon nga fogging rason nga wala man sila naka-evacuate.
Ginpahayag sang doktor nga nadulaan sang hangin ang utok ni Cherry Lyn tuga sang asthma.
Kaangay man nga kaso ang natabo sa isa ka tuig nga bata nga ginaalegar napatay bangud sa asthma matapos ng fogging sa ila lugar.
Suno kay Emily Cordova, iloy sang lapsag, nakibot na lang sila nga may yara na sang aso nga nagsulod sa ila nga balay.
Bangud sini, gilayon niya nga ginpaguwa sa balay ang iya bata agud mapalayo sa aso apang sang gab-i na, gin-atake sang asthma ang lapsag kag ginbawi-an sang kabuhi sa hospital.
Samtang, sa interview man sang Bombo Radyo kay Punong Barangay Karl Lapascua sang nasambit nga barangay, iya ginpahayag nga wala siya sang ideya nga may ginpatigayon nga fogging ang grupo ni Iloilo City Councilor Alan Zaldivar sa ila nga lugar.
Suno kay Lapascua, nakibot lang sila sang nag-abot ang grupo nanday Zaldivar agud magpatigayon sang fogging.
Dugang pa sang natungdan, kun napahibalo lang sila natuhoy sa fogging, napreparahan nila ini kag nahatagan sang paandam ang mga pumuluyo.
Magapatigayon naman sang imbestigasyon ang City Health Office sa kamatayon sang duha ka biktima agud mahibaluan kun fogging gid man ang gintunaan sang ila kamatayon.
