ILOILO CITY- Naglab-ot sa 208 ka mga driver kag konduktor sang public transportation services ang ginpaidalom sa random drug test sa Iloilo City kag Bacolod City kadungan sang ginpatuman nga OPLAN HARABAS bilang kabahin sang mas ginpabaskog nga anti-drug operations para sa nagahilapit nga Semana Santa.
Ini ang ginpangunahan sang PDEA-VI sa pagpamuno ni Acting Regional Director Alex M. Tablate upod sa Philippine National Police, Land Transportation Office, Philippine Coast Guard, Public Safety and Transportation Management Office kag Department of Health.
Sa interview sang Bombo Radyo kay Atty. Allan Sacramento, Chief of Operations sang LTO Region 6, iya ginpahayag nga tinutuyo sang operasyon nga malikawan ang pagluntad sang aksidente kag mabutang sa alang-alang ang kabuhi sang mga pasahero bangud sa mga drivers sang public utility vehicles nga yara sa idalom sang impluwensya sang illegal drugs.
Suno kay Sacramento, ila man nga katuyuan nga masiguro nga ang tanan nga public transportation ang yara sa maayo nga kondisyon para magbyahe sang malayo.
May yara man sang K9 Interdiction Units nga ginabug-usan sang narcotic-detection dogs nga nagpatrol sa lugar agud maka- detect sang illegal drugs
Wala naman sang may nagpositibo sa amo nga drug test nga ginpatigayon sa Ceres Liner Vallacar Transit sa Camalig, Jaro, Iloilo City, UV Express Terminals sa Jaro, Iloilo City, North Bus Terminal sa Brgy. Bata kag South Bus Terminal sa Bacolod City.
