Naangkon sang Gilas Pilipinas ang mapait nga kapaslawan sa kamot sang Lebanon sa ikaduha sini nga hampang sa Doha International Cup sa Qatar.
Nagtakop ang hampang sa skor nga 75-54 sa Qatar University Sports & Events Complex ala una subong nga kaagahon oras sa Pilipinas.
Nanguna sa 21-puntos nga abanse sang kasumpong sanday Gerard Hadidian kag Jad Khalil nga may tag-18 puntos.
Sa pihak nga bahin, duha lamang sa players sang Gilas ang nakalab-ot sa double figures. Naka-21 puntos si Justin Brownlee, 11 rebounds, kag 1 assist, samtang may 10 points naman si Calvin Oftana lakip ang duha sini ka three-pointers.
Nalutos ang Lebanon sa Egypt sa imbukada nila nga hampang, kag gin-pierde naman sang Pilipinas ang Qatar sa first game —buot silingon, pareho sila nga may 1-1 win-loss record.
1:30 buwas sa kaagahon, atubangon sang Gilas ang Egypt nga amo ang katapusan nila nga game.
Ini nga mga hampang ang kabahin sang preparasyon sang Gilas sa final window sang FIBA Asia Cup Qualifiers subong nga Pebrero. Bisan kuwalipikado na ini sa tournament bangud sa matinlo nga record, ginagamit man ni Coach Tim Cone nga kahigayunan ang friendly matches agud nga mapreparahan ang mas dalagku nga kasumpong sa FIBA Asia Cup sa Agusto.
