Ginpaidalom sa State of Calamity ang banwa sang Ajuy matapos ginpasar sang Sangguniang Bayan ang Resolution No. 2026-088 kahapon, Marso 31, bangod sang nagapadayon nga energy emergency.
Ini nga tikang ginbase man sa MDRRMO Order No. 60, Series of 2019 nga naga-deklarar sang state of calamity kon duha ukon mas madamo nga barangay ang apektado.
Sa interview sang Bombo Radyo kay Mayor Loida Espinosa, iya ginpahayag nga antes pa sang pagdeklarar ni Pangulong Ferdinand “Bongbong” Marcos Jr. sang state of energy emergency, nakaeksperyensya na sang kakulangan sa enerhiya ang pila ka barangay, labi na ang sektor sang pangisdaan.
Bangod sini, nagdesisyon ang lokal nga panguluhan nga magdeklarar sang state of calamity agud mapadasig ang paghatag sang bulig sa mga apektado.
Isa sa mga inisyatibo sang banwa amo ang pagbalik sa paggamit sang layag bilang dugang nga pamaagi sa pangisda, nga mahimo na subong nga hybrid.
Gina-explore man sang LGU sang Ajuy ang alternatibo nga livelihood program, pareho sang pag-produce sang asin, agud indi na kinahanglanon sang pumuluyo nga magbakal pa sini sa iban nga lugar.
Sa sektor sang transportasyon, kapin sa 300 ka tricycle drivers naman nga may mga prangkisa ang nabuligan na kun sa diin ginahatagan ang mga ini sang 15 ka kilo nga bugas bilang suporta.
