Nasapwan na lang sang isa ka amay ang tatlo niya ka kabataan nga nagapaligo sa kaugalingon nga dugo sa sulod sang ila balay sa Hacienda Badiang, Barangay E-Lopez, Silay City, Negros Occidental.
Sa malain nga palad, isa ka gid sa ila ang napatay samtang kritikal naman ang duha nga ginabulong subong sa ospital.
Ang napatay amo ang siyam ka tuig nga babaye samtang ang mga pilason amo ang 14-anyos nga babaye kag apat ka tuig nga lalaki.
Ang mga biktima, ginpanglampusan sang bato sang wala pa makilal-an nga mga suspek.
Wala sang iban nga kaupod ang mga biktima sa ila balay bangud nagatrabaho sa Bacolod City ang ila amay nga si Edmon Bornales kag kun weekend lamang ini nagapauli.
Sa Saudi Arabia naman nagatrabaho ang ila iloy.
Sa imbestigasyon sang kapulisan, wala nakapauli sang Biyernes sang gab-i ang amay bangud nagaulan gani sang Sabado sang aga na ini nakapauli sa ila balay.
Didto na kag naabtan niya ang makakuluoy nga sitwasyon sang iya kabataan.
Nakit-an man sa sulod ang mga bato nga posible gin-gamit sa krimen.
May ginasundan na subong nga person of interest ang mga otoridad samtang nagapadayon ang imbestigasyon.
