LEGANES, ILOILO – Upos ang tatlo ka mga balaligyaan sa sunog sa Sitio Pangpang, Brgy. Guinobatan, Leganes, Iloilo.
Ang mga nasunog nga tiyangge ang ginapanag-iyahan nanday Leah Patricio sang Brgy. Cari Mayor kag Nemia Gailan sang Brgy. Guinobatan sa nasambit nga banwa.
Sa interview sang Bombo Radyo kay Police Staff Sergeant Leo Barnuevo, imbestigador sang Leganes Municipal Police Station, iya ginpahayag nga nakit-an na lang ni Leo Patricio, utod sang tag-iya nga si Leah Patricio, nga nagakasunog na ang tiyangge nga ginapanag-iyahan ni Nemia Gailan.
Suno kay Barnuevo, ginpukaw ni Leo ang iya mga kaupod sa sulod sang tiyangge kun sa diin sila temporaryo nga naga-istar.
Bangud madasig nga nagmakot ang kalayo, gilayun ini naglapta sa kaiping nga mga balaligyaan.
Padayun pa nga ginahibalo ang gintunaan sang sunog kag ang balor sang halit nga gintuga sini.
