Patay ang apat ka tuig nga bata nga babaye sa Don Carlos, Bukidnon matapos ginapahayag nga ginhiluan sang iya mismo nga Lola gamit ang iya beberón ukon feeding bottle.
Natabo ang insidente sang Huwebes, Agusto 13.
Sandig sa mga pulis, nagtaliwan man ang Lola matapos nga ginhiluan man sini ang kaugalingon.
Suno kay Police Lt. Rufina Bayarcal, Deputy Chief of Police sang Don Carlos Municipal Police Station, sang alas sais sang gab-i sang amo nga adlaw, may nabaton sila nga distress call nga nagapanugid nga nag-away ang Lola kag ang iya bana.
Nagresponde ang mga pulis, apang pag-abot sa area, nakalakat na ang Lolo bangud ginapahayag nga naglikaw na lang ini bangud naga-wild na ang Lola.
Naglakat man ang mga pulis kasunod sang amo nga hitabo.
Makadali lang matapos nagbiya ang mga police personnel, nagbalik sila sa area bangud sa nabaton nga isa na naman ka tawag.
Sang nag-abot sila sa lugar, nakit-an nga nagasuka na ang bata. Pareho nga gindala ang Lola kag ang bata sa ospital sang alas otso sang gab-i.
Ginapahayag nga may nakit-an ang mga pulis sa area nga feeding bottle nga ginasuspetsahan nga may unod nga hilo.
Na-recover man sa lugar ang duha ka sachets sang zinc phosphide. Isa ini ka chemical pesticide nga ginagamit agud magpatay sang ilaga. Ini ang ginapatihan nga gin-gamit sang Lola agud nga hilu-an ang iya kaugalingon kag ang iya apo.
𝗠𝗔𝗬 𝗡𝗔𝗔𝗚𝗬𝗔𝗡 𝗡𝗔 𝗡𝗚𝗔 𝗩𝗜𝗢𝗟𝗘𝗡𝗧 𝗗𝗢𝗠𝗘𝗦𝗧𝗜𝗖 𝗜𝗡𝗖𝗜𝗗𝗘𝗡𝗧
Ginkumpirma man sang pulis nga antes ini nga hitabo, nakaluwas pa anay ang bata sa insidente sa sulod man mismo sang ila balay sang siya ang naga-edad sang isa pa lamang ka tuig.
Kun balikan, sang 2023, may krimen sa Bukidnon kun sa diin ginkastigo sang lalaki ang iya live-in partner nga amo ang iloy sang bata.
Nakit-an sa closed circuit television (CCTV) nga nahulog pa ang bata sa sofa samtang ginasakit sang lalaki ang iya iloy.
Sang ulihi, ginbuno pa gid sang lalaki ang babaye nga rason sang kamatayon sini. Na-preso ang lalaki kasunod sang krimen, kag tubtub subong, nakahunong ini sa Davao Penal Colony.
Ini ang rason kun ngaa gindala ang bata sa pagtatap sang pamilya sang iya iloy.
Ginaalegar nga may history sang suic*de attempts ang Lola antes ang insidente sang Huwebes.#
