Nagpanawagan ang former Senate Presidents sa mga nagapungko subong nga mga senador nga hagan-haganon na ang inaway sa pulitika kag resolbahon na ang mga tensyon sa sulod sang Senado.
Nakabutang ini sa joint statement nanday former Senate Presidents Aquilino “Koko” Pimentel III, Juan Miguel “Migz” Zubiri, Vicente”Tito” Sotto III, kag Frank Drilon.
Sanday Zubiri kag Sotto ang pareho pa nga incumbent senators kag yara sa Gatchalian bloc sa upper chamber.
“We, former Presidents of the Senate of the Republic of the Philippines, speak at this difficult moment out of our shared moral duty to the institution we once had the honor to lead,” kabahin sang joint statement.
Suno sa ila, ang pinakamataas nga katungdanan sang Senate President indi amo ang pag-insister nga magpabilin sa pwesto, kundi ang pagpasiguro nga mabakod, ginatahod, kag nagasunod sa layi ang chamber.
Ginhingyo man nila sa incumbent senators nga ipabilin lang sa sulod sang Senado ang ano man nga indi paghangpanay. Tion na suno sa ila nga maghatag na sang atensyon sa legislative responsibilities sang Senado.
“We call on all incumbent senators, regardless of bloc or affiliation, to de-escalate public rhetoric that demeans the Senate and weakens confidence in it; to confine their disagreements to the floor and to the proper forums, where the arguments and the votes can be scrutinized by the public; and to prioritize the urgent work before the Senate (the economy, food and energy security, and justice) over internal maneuvering,” dugang sa statement.
Ginpanawagan man nila sa tanan nga mga senador nga dasigon ang pagsolbar sang krisis sa sulod sang chamber ilabi na subong kun sa diin madamo ang problema sa ekonomiya, may pagpamahog sa seguridad sang pungsod, kag may daku nga pagduda ang publiko sa mga institusyon sa pungsod.
Si Pimentel amo ang nangin Senate President halin sang 2016 tubtub 2018; Sotto halin sang 2018 tubtub 2022 kag 2025 tubtub 2026; Zubiri halin sang 2022 tubtub sang 2024; kag si Drilon sang 2000, 2001 tubtub 2006, kag 2013 tubtub 2016.
Matandaan nga gin-eleher si Senator Sherwin Gatchalian bilang Senate President Pro Tempore sang Hunyo 3 apang gintawag ini sang kampo ni Sen. Alan Peter Cayetano nga iligal. Naga-insister si Cayetano nga siya gihapon ang Senate President tubtub nga may 13 senators nga maka-eleher sang magabulos sa iya.#
