Ginkumpirma sang Department of Foreign Affairs (DFA) nga may apat ka iban pa nga mga Pilipino nga naka-detain subong sa Ukraine bangud sang ila pagserbe para sa Russian forces.
Magluwas pa ini sa nauna na na-report nga si Raymon Gumangan nga subong man isa ka prisoner of war sa Kyiv bangud sa kaangay man nga rason.
Napasaka naman sa DFA ang request para sa assistance sa lima, apang nagpamalibad ang ahensya nga maghatag sang dugang nga detalye sa publiko.
Suno pa sa ahensya, may isa ka Pilipino nga napatay, kag nakatigayon naman nga nakapakig-angot ang DFA sa iya pamilya.
Sa subong, lain-lain pa nga bersyon sang istorya ang nagaabot sa DFA sa kun paano na-recruit ang mga Pilipino.
Nagpanawagan liwat ang department sa mga Pinoy nga maghalong gid sa mga ginatanyag nga trabaho sa luwas sang pungsod ilabi na kun nakit-an lang online ang offer.
Nahibaluan nga may deployment ban ang Pilipinas sa Ukraine, apang wala sang kaangay nga ban para sa Russia.
Una na nga naghingyo si Sen. Erwin Tulfo, chairman sang Senate Committee on Foreign Relations, nga buligan si Gumangan nga makaguwa sa presuhan sa Ukraine, apang nagpaathag ang DFA nga mabudlay ang sitwasyon bangud wala man sang kaangtanan ang Pilipinas sa gyera sa amo nga pungsod.
Ginpasalig man anay sang ahensya nga napalab-ot na nila sa Ukrainian kag Russian authorities ang amo nga sitwasyon ni Gumangan.
