Ginkumpirma sang Department of Health (DOH) nga maka-gwa na bwas nga adlaw, Pebrero 22, sa quarantine facility sa New Clark City, Tarlac ang 49 ka mga Filipinos nagikan sa Wuhan City, China nga ginpaidalom sa 14 ka adlaw nga quarantine bangud sang ginakahangaw-an nga coronavirus disease 2019.
Sa exclusive interview sang Bombo Radyo kay Dr. Gerardo Bayugo, undersecretary sang DOH sa Field Implementation and Coordination, iya ginpahayag nga nangin negatibo sa coronavirus disease ang tanan nga mga pasyente.
Suno pa sa opisyal, hilway na nga makapauli sa ila mga balay ang amo nga mga Filipino repatriates nga ginalakipan sang 30 ka Overseas Filipino Workers (OFWs) halin sa Hubei, anom ka flight crew members, tatlo ka ground crew operators, kag pulo ka miyembro sang repatriation team matapos nga wala sang sintomas sang nasambit nga virus kaangay sang ubo, hilanat, kag sore throat.
Samtang, dugang pa sang opisyal, pagkatapos sang send-off ceremony bwas, liwat nga himuson ang quarantine facility bangud natalana naman nga maga-abot ang masobra 500 ka mga Filipinos nagikan sa Japanese cruise ship Diamond Princess agud mapaidalom man sa 14 ka adlaw nga quarantine.
Sa inisyal nga impormasyon sang natungdan, wala na sang ibilin pa sa nasambit nga barko kag posible suno sa iya nga duha ka eroplano ang gamiton agud makabalik sa Pilipinas ang amo nga mga Filipino.
Nahibaluan nga sa 3,711 ka tawo nga sakay sang Diamond Princess, 538 ang Filipinos — sa diin, 531 ang crew members kag pito ang pasahero.
Una naman nga ginpahayag ni Health Secretary Francisco Duque III nga indi pa sigurado kun 538 gid ka mga Filipino ang iga-repatriate bangud mahimo man nga magdesisyon ang iban nga magtinir sa Japan.
