ILOILO- Hugot nga ginabantayan sang Philippine Army ang lima ka kabanwahanan sa probinsiya sa diin ginapatihan lapnagon ang recruitment sang Communist Party of the Philippines- New People’s Army sa mga menor de edad.
Sa interview sang Bombo Radyo kay Lt Col Joel Benedict Batara, ang Commander sang 61st Infantry Hunter Battalion, iya ginpahayag nga madamo na sang na recruit nga mga kabataan partikular na ang yara sa Junior kag Senior High school agud nga
mangin katapo sang Communist Party of the Philippines- New People’s Army sa banwa sang Tubungan, San Joaquin, Miag-ao, Igbaras sa 1st district kag Leon sa 2nd district.
Suno kay Batara, ang mga kabataan kag pila ka mga kababainhan nga gina- recruit sang mga rebelde agud nga mag upod sa ila nga grupo ang kalabanan naga-istar sa nabukid nga bahin sang nasambit nga kabanwahanan.
Matandaan nga sang tinalikdan nga election period, may nakit-an nga mga kabataan nga miyembro sang Suyak Platoon, Southern Front sang Komiteng Rehiyon Panay sa San Jose, Miag-ao nga nagapangkakas sang mga posters sang isa ka kandidato sa pagka- kongresista sa 1st district.
Ini nga mga kabataan nga rebelde amo ang ginapahayag nga na-engkwentro sang tropa sang gobyerno sa brgy. Ongyod, Miag-ao sa diin isa ka menor de edad nga rebelde ang nasapwan nga patay kag pilason sa engkwentro nga natabo kahapon.
Suno sa isa ka anay rebelde, ang napatay amo si Vincent Yovero alyas Denden sang Toog, Miag-ao.
Bangod sa recruitment sang mga rebelde, may yara sang mga programa ang 61st Infrantry Battalion agud matapna ini.
Suno kay Batara, nagakadto sila sa mga eskwelahan kag naga conduct sang peace forum kag sang nagligad nga mga bulan, may gin- conduct sila nga youth camp sa banwa sang Igbaras sa diin ila ginatudlo nga ang ila armas indi pusil kundi husto nga impormasyon.
