ILOILO CITY – Yara na sa kustodiya sang Department of Social Welfare and Development Office ang 16 anyos nga dalagita nga ginhimuslan sang makapila ka bes sang kaugalingon nga amay sa Brgy. San Pedro, Molo, Iloilo City.
Sa interview sang Bombo Radyo sa Barangay Tanod Member nga nagpakilala sa hayo nga Lantoy, iya ginpahayag nga natabo ang insidente sang Hulyo 10 kun sa diin makatatlo ka bes nga ginhimuslan ang biktima.
Suno sa Tanod Member, gilayon nga ginpatigayon ang rescue operation kasunod sang rape incident nga ila nabaton kun sa diin naabtan pa nga nagahilibion ang 16 anyos nga dalagita.
Ginpahayag sang Tanod Member nga ginpaidalom na sa medical examination ang biktima samtang nadakpan naman ang 65 anyos nga amay.
Sang natabo ang insidente, ginpahayag sang biktima nga yara sa hospital ang iya iloy agud magbantay sa nagamasakit nga manghod nga lalaki.
Bisan ang babayi nga manghod nga kaupod sang biktima sa balay ang na-trauma naman kasunod sang hitabo.
Ginapahayag nga naglayas ang magulang nga babayi sang 16 anyos nga dalagita bangud sa malain nga ginahimo sang iya amay.
