Patay ang isa ka 67-anyos nga lola sa Brgy. Magdapio, Pagsanjan, Laguna matapos ini hungod nga ginsunog sa sulod sang iya nga tiyangge sini lang nga byernes, Oktubre 16.
Nakilal-an ang tigulang nga biktima kay alyas “Divina,” nga tumandok sang nasambit nga lugar.
Suno sa report sang Pagsanjan Municipal Police sa pagpanguna ni PMAJ. Gerald P. Balansi, alas-3 sa kaagahon sang natabo ang sunog sa tiyangge ni lola Divina.
Sa nauna nga imbestigasyon sang Bureau of Fire Protection (BFP), faulty electrical wiring ang ginalantaw ginhalinan sang sunog nga rason sang kamatayon sang biktima.
Matapos nga ginpaidalom sa autopsy ang bangkay sang tigulang, natukiban sang mga eksperto sang Provincial Forensic Unit (PFU) nga may saksak pa sa liog ang senior citizen kag ginatudlo nangin rason sang pagtaliwan sini.
Bangud diri, mas ginpasangkad ang imbestigasyon sang mga awtoridad nga nagresulta man sa pagka-aresto kay Alyas ‘Lorenz’ nga ginapahayag nakit-an nga nagadalagan halin sa tindahan sang biktima pila ka minutos bag-o nag-ibwal ang kalayo.
Base sa imbestigasyon, ginsukot sang biktima ang suspek nga may utang sa iya nga 3,000 pesos, apang nagpamalibad pa si Lorenz nga nangin rason sang pahayag ni Divina nga ipalab-ot na niya ini sa barangay.
Ini man ang nangin rason nga ginpatay sang suspek ang biktima.
Sa subong, yara na sa kustodiya sang kapulisan ang suspek nga nagapangatubang sang kaso nga murder kag arson.
