May dugo nga Ilonggo ang nagtaliwan nga aktres nga si Susan Roces, ang ginakilala nga “Queen of Philippine Movies”.
Ginsaysay ini ni Nereo Luján, isa ka local historian, sa Bombo Radyo. Frenchmen ang kalolohan ni Roces nga nag-abot sa Iloilo sang 1870s matapos nga nagpalagyo sa ila pungsod bangud sa natabo nga Franco-Prussian War.
Ini nga Frenchmen amo ang mag-utod nga sanday Adolf, Charles kag Rafael Levy nga amo ang ginakilala nga may daku nga kontribusyon sa jewelry kag retail business sa syudad sang Iloilo.
Ang nasambit nga mag-utod amo ang founder sang La Estrella del Norte, isa ka shop nga nagabaligya sang mga malahalon nga mga items kaangay sang Swiss wristwatches, gramophones, jewelries, perfumes, kag imported nga mga bayo.
Nagbukas ini nga shop sa Calle Real sa syudad sang 1873. Nangin popular ang negosyo sang mag-utod kag sang ulihi, ginbuksan ang dugang nga brances sini lakip na sa Manila kag sa iban pa nga mga pungsod.
Sang ulihi, mas ginpasangkad pa gid ini kag nagsulod sa car dealership kag cargo shipping sa idalom sang business name nga Levy Hermanos.
Ang Levy Hermanos amo ang nagdala sang labing-una nga salakyan sa Pilipinas — ang 9-horsepower, 2-cylinder 1904 Richard Brasier roadster nga halin sa France kag na-ship sa Pilipinas sang 1904.
Sa tatlo nga mag-utod, si Adolf lang ang nagtinir sa Pilipinas samtang nagbalik naman sanday Charles kag Rafael sa France.
Nangasawa si Adolf kay Benita Enriquez sang Iloilo kag may anak sila nga si Francisco.
Napatay si Adolf sa Manila sang 1888 sa edad nga 39.
Ang iya naman anak nga si Francisco Levy ang nangasawa kay Luisa Gallo sang Iloilo kag may siyam ka mga anak.
Ang subang nga anak nga si Purificacion ang nagpamana naman kay Dr. Jesus Sonora sang Bacolod City.
Sila ang mga ginikanan nanday showbiz celebrities nga sanday Rosemarie Sonora, kag Jesusa Purificacion Sonora nga mas kilala nga si Susan Roces.
Nangin popular sa Philippine movies si Roces.
Napamana sini si Fernando Poe, Jr. nga amo naman ang ginbansagan nga King of Philippine movies.
May adopted daughter sila nga si Senator Grace Poe nga ila man nga ginpadaku halin sang nakit-an ini sa isa ka simbahan sa Iloilo. Kagab-i, Mayo 20, sang ginkumpirma nga napatay si Roces sa edad nga 80. ##
