ILOILO CITY- Naglab-ot na sa 72 ka mga manugbaligya sang firecrackers ang nahatagan sang special permit to sell sang Business Permits and Licensing Office sang Iloilo City Government.
Sa interview sang Bombo Radyo kay Mr. Norman Tabud, pinuno sang nasambit nga opisina, iya ginpahayag nga ang 72 ka mga sellers ang naggikan sa nagkalain-lain nga mga firecracker zones.
Ini ginabug-usan sang 46 sa distrito sang Arevalo kun sa diin ipahamtang ang ila mga pwesto malapit sa Aquapolis Subdivision; 24 sa distrito sang Jaro sa diin ipahamtang ang pwesto sa Uhong-uhong sa Buhang,Jaro; kag 2 lang sa City proper sa diin ipahamtang ang ila pwesto sa Muelley Loney.
Suno kay Tabud,antes ang pag-isyu sang business permit, gincomply sang mga sellers ang mga rekisitos kaangay sang Fire Safety Inspection Certificate naggikan sa Bureau of Fire Protection, brgy. clearance, authority gikan sa distributor, kag kopya sang certificate gikan sa supplier.
Pila sa mga guidelines naman sa pagpatindog sang stalls amo nga dapat human ini sa galvanized iron ukon hardiflex agud indi madasig maduktan sang kalayo, duha ka metros ang antad sa tupad nga stalls, kag malayo sa residential areas.
Ang period sang pagbaligya ang magasugod sa Disyembre 23 kag magatakop sa Disyembre 31.
Samtang pangunahan naman sang Public Safety and Transportation Management Office ang pagcheck sang mga pwesto sang mga sellers.
