Nagpanindugan ang punong barangay sang Cabudian, Dueñas, Iloilo nga wala sang may nakapalapit sa iya agud nga maghingyo nga magpatigayon sang quarry operation sa ila nga lugar.
Ang Cabudian amo ang isa sa mga barangay kun sa diin nagpatigayon sang anti-illegal quarry operation ang Provincial Environment and Natural Resources Office (PENRO) sang Abril 29.
Sang amo nga tion, may mga na-recover nga mga heavy equipment kaangay sang apat ka backhoe kag isa ka payloader, apang naka-lock na kag wala na sang driver. Didto kag naggwa ang impormasyon nga basi kun may nakapahibalo sa ila nga may operasyon ang PENRO kag nagpahayag man ang opisina nga may mga ma-impluwensya nga tawo sa likod sang quarrying.
Sa interview naman sang Bombo Radyo kay Punong Barangay Joel Jayson, iya ginpahayag nga malayo na sa ila sa Cabudian ang quarrying site apang indi pa sini makumpirma kun sakop ini sang Lambunao ukon Calinog bangud boundary na ini sang tatlo ka banwa.
Suno kay Jayson, halin sa iya una nga termino, wala gid sang nakapangayo sang permit sa iya.
May ihibalo man si Jayson nga may quarrying malapit sa daan nga ginaagyan sang suba ukon sa old river, apang wala siya nakahibalo nga sakop ini sang iya nga barangay.
Suno sa iya, sang nag-inspeksyon ang PENRO kag MENRO, nakibot na lamang siya nga gintudlo na ang iya barangay.
Magluwas diri suno sa iya, wala man siya sang ihibalo kun sin-o ang nagapanag-iya sang duta.
Kun may truck man nga magsulod, ginapahayag nga nagasulod ini halin sa Dalid, Lambunao kag naga-exit sa provincial road sang Duenas kag Calinog, apang wala na nagalabay pa sa barangay road sa ila sa Cabudian.
Kun may mag-apply man sang permit suno sa iya para nga makapatigayon sang quarry, ipaidalom pa ini sa maid-id nga proseso kaangay sang public hearing, zoning, kag inspection.
Handa man si Jayson nga mag-atubang kun imbestigaran siya sang PENRO.
Una na nga gin-identify ni PENRO head Atty. Cesar Emmanuelle Buyco Jr. ang banwa sang Dueñas, Calinog, kag Lambunao bilang key areas kun sa diin nagapadayon ang illegal quarrying.
Sa joint operation sang PGENRO, Iloilo Police Provincial Office, kag Mines and Geosciences Bureau sang Abril 29, wala sang nadakpan.#
