Patay ang walo ka mga tawo samtang pilason naman ang isa ka bata matapos nga narusdak ang isa ka balay sa Kabul, Afghanisytan bangud sa mabaskog nga linog kahapon nga adlaw Abril 3 suno sa National Disaster Management Authority.
Base sa German Research Centre for Geosciences, nag-igo ang 5.9 magnitude nga linog sa rehiyon sang Hindu Kish nga may kadalumon nga 177 kilometro.
Nabatyagan ang mabaskog nga linog sa nagkalain-lain nga lugar kalakip ang Islamabad sa Pakistan, amo man sa Kabul kag New Delhi sa India.
Nahibaluan nga ang Afghanistan kilala bilang isa ka pungsod nga vulnerable sa mga kaangay nga hitabo bangud sa geography sini nga madamo sang bukid.
Ginabulubanta nga naglab-ot sa 560 ka tawo ang nagakapatay kada tuig bangud sa linog sa nasambit nga pungsod.
Sang Nobyembre 2005, isa ka mabaskog nga linog nga may magnitude 6.3 ang nag-igo sa Afghanistan, nga nagbilin sang indi magnubo nga 27 ka tawo nga napatay bangud naguba ini sang ginatos ka mga kabalayan.
