Patay ang siyam ka mga tawo lakip ang anum ka kabataan bangud sang airstrike sang Israel sa balay sa syudad sang Rafah sa Gaza.
Ini ang development matapos nga nagliso ang atensyon sang publiko sa bayluhanay sang atake sang Iran kag Israel sang nagligad nga semana, apang subong nagbalik ang focus sa Rafah — ang syudad kun sa diin nahamtang ang masobra katunga sa 2.3-million nga populasyon sang Gaza.
Ang strike ang natabo Byernes sang kagab-ihon sa western Tel Sultan sa Rafah suno sa Gaza Civil Defense.
Nahibaluan nga apisar madamo ang nagapamatok sa pag-atake sang Israel sa Rafah lakip na ang USA bangud pat-od nga madamo nga sibilyan ang madalahig, indi magpapugong ang militar sa ila plano nga ground offensive bangud ila ginapatihan nga didto nagahukmong ang nabilin nga Hamas militants.
Madamo man nga Palestinians ang nagbiya sa Rafah kag nagkadto sa border sa Egypt kahapon nga adlaw matapos nakabaton sang evacuation alert halin sa Israeli army bangud sa ila plano nga airstrike.
Nahibaluan nga yara na 34,049 ang napatay kag masobra 76,000 ang nasamaran bangud sa gyera sa Gaza halin sang nagsugod ang Israel-Hamas war sang Oktubre 7,2023. #
(Courtesy of: The Globe and Mail)
