Pila ka mga Pinoy sa UK, nagakahangawa sa ila seguridad kasunod sang terror attack

ILOILO CITY – Nagabatyag sang kahadlok ang pila ka mga Pilipino sa United Kingdom kasunod sang pag-atake sa parliyamento sa London kun sa diin lima ka tawo ang patay samtang 40 ang pilason.
Sa interview sang Bombo Radyo Iloilo, ginpahayag ni Tina Cacho sang Pavia, Iloilo apang sa karon nagatrabaho na bilang healthcare assistant sa London, may trauma na ini bangud iya nadumduman ang nagluntad man nga London attacks sadtong 2012 kun sa diin malapit man ini sa ginluntaran sang insidente.
Suno kay Cacho, 30 minuto nagikan sa parliyamento ang iya ginapuy-an, apang nagakabalaka ini nga magluntad ang dugang nga pagpang-atake kag magluntad na sa ila lugar.
Bangud sang kahangawa, mas ginpili sang Ilongga OFW nga indi anay maglagaw kag nag-absent sa trabaho.
Naobserbahan man sini nga ginhugtan ang seguridad sa London kun sa diin wala untat ang paglibot sang salakyan sang mga pulis sa ila lugar kag mas madamo nga security forces ang gin-deploy.
Ang King’s College Hospital kun sa diin gindala ang pila sa mga pilason ang malapit lang sa puluy-an ni Cacho.
Nahibaluan nga ang embahada sang Pilipinas sa United Kingdom ang malapit lang sa Westminster Palace nga amo ang talatapan sang British parliament.