Masobra 50 ka pamalay naupos, 2 pilason sa sunog sa Iloilo City

ILOILO CITY – Gintupok sang kalayo ang 53 ka mga pamalay kaina sang kaagahon sa Barangay Lopez Jaena, La Paz, Iloilo City.
Ginpahayag sa Bombo Radyo Iloilo ni Punong Barangay Marjorie Gregorios nga nagsugod ang kalayo sa poste sang koryente nga madugay na nila ginareklamo.
Guba na suno kay Gregorios ang poste kag masami naga-spark ang koryente.
Kaina sang kaagahon liwat ini nagkarab-karab kag nahulog sa atop sang balay ni Tessie Jaena.
Ginpahayag ni Punong Barangay Gregorios nga bangud himo sa light materials ang balay, madasig nga naglaton ang kalayo sa kaiping nga mga pamalay.
Duha ka tawo ang nag-angkon sang minor injury sa nasambit nga sunog.
Suno sa Bureau of Fire Protection, nabudlayan ang mga ini sa pagpalong sang kalayo bangud makitid ang dalanon sa lugar kun sa diin nagluntad ang sunog.
Sa interview sang Bombo Radyo Iloilo, ginpahayag ni City Fire Marshall Supt. Jerry Candido nga short circuit ang gintunaan sang sunog.
Sa karon nagapabilin sa simbahan sang Iglesia Filipina Independiente ang mga pamilya nga nawad-an sang puluy-an bangud sang sunog.