Wala sang Pinoy nga naulamid sa terror attack sa concert ni Ariana Grande – DFA

ILOILO CITY – Wala sang Pinoy nga naulamid sa terror attack sa Manchester Arena sa England kadungan sang concert sang pop star nga si Arianna Grande sa England.
Sa exclusive interview sang Bombo Radyo Iloilo kay DFA spokesperson Robespierre Bolivar, ginpahayg sini nga sa pinakaulihi nga report nga ila nabaton halin sa embahada sang Pilipinas sa England, wala sang Pinoy nga nadalahig sa pagpang-atake apang padayon sa gihapon ang ila monitoring sa nasambit nga insidente.
Nagpalab-ot man sang pangamuyo kag pag-unong ang Pilipinas sa England sa diin 22 ang napatay kag masobra 50 ang pilason.
Sa subong, padayon pa ang pagpakig-angot sang ahensya sa embahada sang Pilipinas sa England agud matumod ang rason sa posible terroristic attack.
Nahibaluan nga nagadangat sa 200,000 ang mga Pinoy sa England.