1 ka Pinoy kumpirmado nga pilason sa pagkasunog sang apartment tower sa London

ILOILO CITY – Isa pa lamang ka Pinoy ang kumpirmado nga napilasan sa sunog sa 24 ka panalgan nga apartment building sa west London sa United Kingdom.
Ini ang ginkumpirma sa Bombo Radyo Iloilo ni Department of Foreign Affairs (DFA) spokesperson Robispierre Bolivar.
Suno kay Bolivar, nabisita na sa ospital sang mga katapo sang Philippine Embassy sa London, ang nasambit nga Pinoy.
Apang gin-athag nga indi malala ang kahimtangan sini bangud smoke inhalation lang ang rason sang pagka-ospital sini.
Ginpahayag pa ni Bolivar nga tubtob sa karon indi pa mahimo makabalik sa ila puluy-an ang kapin 3,000 ka mga Pinoy nga nagapuyo sa palibot sang Grenfell Tower nga temporaryo ginpa-evacuate sa pagkahangawa nga mag-collapse ang building.
Nagpalab-ot man sang pagpakig-unong ang Pilipinas paagi sa DFA, sa mga pungsod nga kalakip ang ila mga residente sa 12 ka mga nagkalamatay sa nasambit nga trahedya.