4-years old ginlasak sang truck sa Iloilo City, patay

ILOILO CITY – Patay ang apat ka tuig nga bata matapos malasakan sang truck sa Barangay Tabucan, Mandurriao, Iloilo City.
Ginkilala ang biktima nga si Rhyzz Ann Tacan samtang pilason ang tiya sini nga si Roselyn Dapulang.
Suno kay PO2 Louie Alilano, traffic investigator sang Iloilo City Police Office, nagatabok sa dalan ang napatay nga biktima upod ang iya tiya, tiyo nga si Jerry Dapulang kag ang utod nga si Jhaznen Tacan sang ginbungguan sang truck.
Ginapahayag nga madasig ang dalagan sang truck rason nga nabungguan ang biktima.
Preso na karon sa Mandurriao Police Station ang driver sang truck nga si Ronald Draper sang Barangay Bisog, Anini-y, Antique.