4 bombero pilason sa pagbungguanay sang firetrucks nga magaresponde kuntani sa sunog

ILOILO CITY – Natalana nga ipaidalom sa operasyon ang tatlo ka mga bombero sang Bureau of Fire Protection matapos nagbungguanay ang firetruck sang mga ini kag sang Federation Iloilo Fire Brigade Inc. (FIFI) nga magaresponde kuntani sa sunog sa Dela Rama, City Proper kagab-i.
Na-fracture ang anom ka mga ribs ni Fire Officer 3 Val Cesar Divinagracia nga karon confined sa The Medical City.
Nahibaluan nga si Divinagracia ang nagapungko sa passenger seat sang firetruck nga amu ang naigo sang nabungguan sang firetruck sang FIFI.
Pilas sa ulo kag nagliw-as naman ang siko ni FO3 Wendell Barrientos nga karon confined sa Iloilo Doctor’s Hospital.
Na-dislocate man ang duha ka mga batiis ni FO1 Jommel Edro Solano nga karon yara sa Iloilo Mission Hospital.
Suno kay City Fire Marshall Chief Insp. Bartolome Biliran, blind curve ang ginluntaran sang insidente.
Halin sa Jaro, Iloilo City ang firetruck sang Bureau of Fire Protection samtang padulong naman sa Muelle Loney ang firetruck sang FIFI.
Nag-preno man suno kay Biliran si FO1 Solano nga amu ang driver sang firetruck sang Bureau of Fire Protection, apang nalab-ot gihapon ang firetruck sang FIFI.