ILOILO CITY – Isa ang patay kag duha ang pilason sa pagpang-ambush sa Barangay Dalicanan, Passi City.
Ang mga biktima ang ginkilala nga sanday Joebert Mandate, 37 anyos kag Lodovico Claridad, 35 anyos sang Brgy. Tagubong, Passi City samtang wala pa nakilala ang napatay nga biktima.
Sa interview sang Bombo Radyo kay Claridad, isa sa mga pilason, iya ginpahayag nga nagasakay sila sa tricycle kag nagapauli halin sa baylihan sang hinali lang sila nga gintiro sang wala makilala-an nga mga suspek nga nakasakay sa motorsiklo sang yara na sila sa patyo.
Suno pa kay Claridad, wala siya sang ideya kun nga-a ginpangtiro sila sang mga suspek bangud naghalin man lang sila sa baylihan kag nagtan-aw sang programa.
Tatlo naman ka lupok sang armas ang ila nabatian kag ginapatihan kalibre 45 nga armas ang gingamit.
Ginapatihan nga target sang mga suspek ang biktima nga napatay.
Suno pa sa natungdan, walo sila nga nagasakay sa tricycle lakip na ang duha sa ka mga babayi apang tatlo sila ang gintiro sang mga suspek.
Patay naman ang isa ka sakay sang tricycle nga suno kay Claridad nga naigo gid sa ulo.
Pilas naman sa ilok ang naangkon ni Mandate nga natalana nga operahan samtang kibyas sa abaga ang naangkon ni Claridad.
