2 patay, 4 pilason sa bungguanay sang van kag 10-wheeler truck sa Iloilo

ILOILO CITY – Duha ang patay samtang apat ang pilason sa pagbungguanay sang L300 van kag ten-wheeler truck sa Pulo Maestra Vita, Oton, Iloilo.
Ginkilala ang napatay nga biktima nga sanday Rainier Grecia nga driver sang L300 van, kag kaupod sini nga si Romeo Beloso.
Ginpahayag sa Bombo Radyo Iloilo ni PO3 Randy Flores sang Oton Police Station nga madasig ang dalagan sang van kag naagaw ang lane sang truck nga nagresulta sa head-on collission.
Padulong sa siyudad sang Iloilo ang van samtang pakadto naman sa probinsiya sang Antique ang delivery truck sang matabo ang aksidente.
Ginpanindugan naman sang driver sang 10-wheeler truck nga si Jerry Tingal nga ang van ang may sala.
Suno pa kay Tingal, nagapa-ekis-ekis ang van sang ila nasugata kag nagpreno pa siya apang nakibot na lang sang magbunggo ang van sa iya ginamaneho nga truck.
Gilayon naman nag-surrender sa Oton Police Station si Tingal upod ang helper nga si Mark Tubida.