2 patay sa bungguanay sang ambulansiya kag SUV sa Iloilo

ILOILO CITY – Duha ang patay samtang tatlo man ang pilason matapos magbungguanay ang ambulansiya kag SUV sa Circumferential Road sa Hibao-an Norte, Mandurriao, Iloilo City kaina sang kaagahon.
Ginpahayag sa Bombo Radyo Iloilo ni Eman Sarasa, Municipal Disaster Risk Reduction and Management Officer sang banwa sang San Miguel, Iloilo, nga may dala nga pasyente ang ambulansiya sang San Miguel nga mapaidalom kuntani sa dialysis.
Apang gindeklarar nga dead on arrival ang pasyente nga si Ramon Sampani kag ang asawa sini nga si Rosalyn nga nakasakay man sa ambulansiya, samtang pilason naman ang driver nga si Efrain de Guzman.
Ang Chevrolet nga kotse nga nagbunggo sa ambulansiya, ang ginamaneho ni Gilbert Rey Saclauso sang San Antonio, San Miguel, Iloilo nga karon preso sa Mandurriao Police Station.
Sa interview sang Bombo Radyo kay PO3 Carl Pitalco, traffic investigator sang Mandurriao Police Station, ginpahayag sini nga nagikan ang SUV sa distrito sang Jaro kag padulong kuntani sa distrito sang Arevalo.
Nag-overtake ini sa pick-up kag bangud madasig ang pagpadalagan sang salakyan, nagbunggo ini sa sugata nga ambulansiya.