ILOILO CITY – Gindula na sang kapulisan ang posibilidad nga human error ang rason sang pagkahulog sang Dimple Star bus sa pil-as sa Barangay San Agustin, Sablayan, Occidental Mindoro kun sa diin 19 ang patay samtang 21 naman ang pilason.
Sa interview sang Bombo Radyo Iloilo, ginpahayag ni PO2 Alexis Go sang Sablayan Municipal Police Station nga amo ang imbestigador sa nasambit nga trahedya, nga malayo nga natulugan ang driver nga si Arno Panganiban nga kalakip sa mga napatay, bangud temprano pa sang matabo ang aksidente.
Sa ila pagpangusisa, nadulaan sang preno ang bus kag nag-malfunction ang salakyan.
Suno kay PO2 Go, sa pagpakig-angot nila sa mga survivors, gulpi nga nagpa-ekis-ekis ang bus samtang nagahilapit ini sa taytay kag nahulog sa pil-as nga may kadalumon nga 15 tubtob 20 ka metro.
Kadamuan sa mga nakaluwas ang mga pasahero nga nagapungko sa likod nga bahin sang bus.
Gikan sa San Jose, occidental Mindoro kag padulong kuntani sa Manila rason nga kadamuan sa mga biktima ang residente sang amo nga lugar.
Ginpahayag ni PO2 Go nga sa kabug-usan, 40 katawo ang sakay sang bus lakip na ang driver kag konduktor nga napatay sa aksidente.
