1 patay, 1 pilason sa pagpangluthang sang retired police sa Iloilo

ILOILO CITY – Isa ang patay samtang isa naman ang pilason sa pagpangluthang sang retirado nga pulis sa Barangay Bolilao, Mandurriao, Iloilo City.
Ginkilala ang napatay nga biktima nga si Joseph Ariate, 56, samtang pilason naman ang bata sini nga si Joren Ariate, 21, lunsay residente sang amo nga lugar.
Ginpahayag sa Bombo Radyo Iloilo ni Punong Barangay Nenita Joson sang Bolilao, Mandurriao nga madugay na nga may away ang pamilya sang mga biktima kag ang suspek nga si Ariel Acopicop, isa ka retirado nga pulis.
Antes natabo ang pagpangluthang, nagbaisay pa si Joseph kag ang suspek.
Sang magsulod sa iya puluy-an ang biktima, ginsunod ini ni Acopicop kag ginluthang, mangin si Joren Ariate nga naga-uyat sang cellphone sang matabo ang insidente.
Gilayon nagpalagyo ang suspek matapos ang insidente.