Pagpatay kay Punong Barangay Gregori posible may kahilabtanan sa illegal drugs – PNP

ILOILO CITY – Nagapati ang Iloilo Provincial Police Office (IPPO) nga may kaangtanan sa iligal nga droga ang motibo sa pagpatay kay Bakhaw, Mandurriao, Iloilo City Punong Barangay Remia Prevendido-Gregori kahapon sang hapon sa kaugalingon sini nga beach resort sa Barangay Igcadlum, San Joaquin, Iloilo.
Napatay man sa amo nga insidente ang yaya sang apo ni Gregori nga si Analee Antipatia, 45, sang Isabela, Negros Occidental samtang pilason ang bana sabng punong barangay nga si Bonifacio Gregori.
Sa interview sang Bombo Radyo, ginapahayag ni IPPO director S/Supt. Marlon Tayaba nga posible may nakaaway sa transaksyon sa iligal nga droga si Punong Barangay Gregori.
Posible man suno kay Tayaba nga may nagplano nga patyon ang opisyal matapos nga nagpakatig-a nga mag-surrender sa mga otoridad.
Ang punong barangay ginakabig nga high value target kag yara sa drug watchlist sang Police Regiaonal office 6 kag Philippine Drug Enforcement Agency kag utod sang napatay nga ginapahayag drug lord nga si Richard Prevendido.
Sa interview sang Bombo Radyo, ginpahayag sang driver ni Gregori nga si Lando Celestre nga bag-o lang nakatapos paligo sa dagat ang punong barangay kag bag-o lang nagsulod sa ila rest house sang ginsulod sang mga armado nga kalalakihan nga naka-bonnet.
Masobra anom ka lupok sang armas ang iya nabatian suno kay Celestre samtang sa guwa sang balay may isa ka lookout nga nakasuksok sang bonnet kag ginpaandaman sila nga indi magpasilabot.
Suno pa kay Celestre nga tatlo ka tuig na nga nagatrabaho bilang driver sang pamilya sang punong barangay, wala man siya sang may nahibaluan nga pamahog sa kabuhi sang iya amo.
Ginpahayag man sa Bombo Radyo ni Chief Insp. Hilarion Roga sang Scene of the Crime Operatives (SOCO), narekober ang mga bala sang kalibre .45 kag 9mm sa rest house kun sa diin napatay ang punong barangay.