Pulis nga ginakabig high value target, pilason matapos gin-ambush sa Iloilo

ILOILO CITY – Pilason ang isa ka pulis nga ginapahayag involve sa iligal nga droga, matapos gin-ambush kahapon sang hapon sa Barangay Dulunan, Arevalo, Iloilo City.
Sakay sang iya salakyan nga Honda Civic nga pula si PO2 Dorben Acap Jr. sang ginluthang sang apat ka mga suspetsado nga sakay sang duha ka motorsiklo.
Duha ka igo sang bala sa abaga ang naangkon sang pulis nga karon stable na ang kondisyon sa ospital.
Pauli na si PO2 Acap sang ginsundan sang apat ka mga suspetsado nga sakay sang duha ka motorsiklo kag ginluthang apang nakabalos ang pulis.
Sa interview sang Bombo Radyo, ginpahayag ni S/Insp. Mary Grace Borio, hepe sang Arevalo Police Station, ginakabig nga high value target si PO2 Acap nga karon assigned sa Regional Personnel Holding and Accounting Unit (RPHAU).
Ginahibalo pa sang Iloilo City Police Office kun may kahilabtanan sa pag-ambush kay PO2 Acap ang napilasan nga si PO2 Melvin Mocorro nga ginapahayag isa sa mga sakay sang motorsiklo nga nag-ambush sa pulis.
Ginpahayag sa Bombo Radyo ni Iloilo City Police Office (ICPO) director S/Supt. Henry Biñas nga gina-imbestigaran pa ang kaangtanan ni Mocorro sa insidente apang indi pa ni makabig nga suspek.