1 patay, 2 pilason sa pagpangluthang sa isa ka pamilya sa Iloilo City

ILOILO CITY – Isa ang patay samtang duha ang pilason matapos ginpaarakan luthang ang isa ka pamilya sa Barangay Nabitasan, La Paz, Iloilo City kagab-i.
Ginpahayag sa Bombo Radyo Iloilo ni SPO1 Venus Gabawa nga napatay sa insidente si Jesryl Jalandoni, 15 anyos, residente sang nasambit nga lugar, matapos mag-angkon sang pilas sa ulo kag hita.
Pilason man ang utod sini nga si Jedia Jalandoni, 18-anyos, kag ang ila iloy nga si Maritess Jalandoni, 45-anyos, isa ka manunudlo.
Sakay man sang salakyan ang duha pa ka menor-de-edad nga kabataan ni Maritess sang natabo ang insidente.
Nagpanyapon sa isa ka restaurant ang mag-iloy kag pasulod na sa ila garahe sakay sang Isuzu Sportivo sang ginpaarakan luthang sang suspek nga si Teofisto Sebanta nga sakay sang motorsiklo kag kasilingan sang mga biktima.
Ginpahayag sang mga kasilingan sang pamilya Jalandoni nga indi magnubo sa anom ka lupok sang armas luthang ang ila nabatian.
Suno naman kay Punong Barangay Barbie Aroza sang Nabitasan, La Paz, Iloilo City, hubog anga suspetsado.
Posible suno kay Aroza nga natripingan sang suspetsado ang mga biktima.