Mag-utod, pilason matapos ginhold-up sa Pavia, Iloilo

ILOILO CITY–Pilason ang truck driver kag utod sini matapos ginluthang sa circumferencial road sa Green Meadows Subd., Brgy. Ungka I, Pavia, Iloilo.
Ang mga biktima amo sanday Ronnie Palabrica, 22-anyos, kag Jovanie Palabrica, 24-anyos, sang  Dumangas Iloilo.
Si Ronnie ang nag angkon sang pilas sa natuo nga kilid tuga sang pagtiro samtang si Jovanie naman ang  nag angkon sang pilas sa ilong tuga sang pag sumbag.
Sa interview sang Bombo Radyo, ginpahayag sang witness nga si Kim Juarez, driver nga upod sa trabaho sang duha ka biktima, nagatulog ang mag utod sang ginsaka sila sang apat ka wala makilal-an nga mga suspetsado nga lunsay hubog.
Mahimo nga hold-up ang motibo sang pagluthang sa mga biktima bangud nakuha ang mga cellphone sang mag-utod.
Suno kay Juarez, nakabalos buno si Jovanie rason sang pagpalagyo sang mga suspetsado kag nagpadulong sa direksyon sang Brgy. Tacas, Jaro, Iloilo City sakay sa isa ka pula nga owner type jeep.
Ang mga biktima ang lunsay yara sa maayo nga kahimtangan.