ILOILO CITY–Nagapati si anay Iloilo Provincial Administrator Manuel Mejorada nga madutlan  si Governor Arthur Defensor Sr. sang kaso nga iya ginpasaka sa Office of the Ombudsman.
Ini kasunod sang pagpasaka niya sang 148 ka kaso batok kay Defensor nga ginalakipan  sang 67 ka counts sang  technical malversation of public funds, 67 ka counts sang violation sang Anti-graft and Corrupt Practices Act kag 14 ka counts sang paglapas sa Omnibus Election Code.
Sa interview sang Bombo Radyo, ginpahayag ni Mejorada nga pat-ud nga madutlan si Defensor sa kaso bangud sa  paggamit sang pondo gikan sa Disbursement Acceleration Program (DAP) nga gindeklarar sang Korte Suprema nga unconstitutional.
Suno kay Mejorada, makabig ini nga technical malversation sang public funds.
Gintumod man ni Mejorada ang pagpanagtag ni Defensor sang kwarta sa mga organisasyon nga wala nag-agi sa nagakaigo nga proseso.
Gindugang man ni Mejorada nga nagpinagusto man si Defensor sa pagpanagtag sang kwarta bisan nga nagsugod na ang 45 ka adlaw nga campaign period sang 2013 election nga suno sa iya, paglapas sa omnibus election code.
Samtang, indi pa makahatag sang komento ang kampo ni Governor Arthur Defensor Sr. tuhoy sa pagpasaka sang dugang nga kaso sa Ombudsman ni Mejorada batok sa gobernador.
Sa interview sang Bombo Radyo, ginpahayag ni Atty. Dennis Ventilacion, provinicial legal officer, hulaton na lang nila nga iserbi sa talatapan sang gobernador ang nasambit nga mga kaso bag-o maghimo sang pamaagi kun paano ini malutsan.