ILOILO CITY–Ginpasakaan na sang kaso si anay Sara Mayor Neptali Salcedo kag iban pa nga subject sang search warrant sa fifth district sa probinsya sang Iloilo.
Ini ang may kaangtanan sa mga nakuha nga de kalibre nga loose firearmas, explosives kag illegal nga druga sa balay sang anay alkalde sa raid sa iya balay.
Sa interview sang Bombo Radyo kay Iloilo Police Provincial Office (IPPO) Director S/Supt Marlon Tayaba, iya ginpahayag nga humalin sang Lunes, amat-amat na nga ginpasaka ang kaso sa Iloilo Prosecutor’s Office batok kanday anay Mayor Salcedo, Noel Salcedo,  Nixon Salcedo Sr., lunsay tumandok sang Sara, Iloilo Nestor Arante sang Banate, Iloilo kag George Sanson sang Estancia, Iloilo.
Sa pagpaathag ni Tayaba, lunsay paglapas sa Republic Act 10591 ukon Firearms and Ammunition Act ang ginpasaka sa mga natungdan.
Sanday anay Mayor Salcedo, Noel Salcedo, Nixon Salcedo Sr. kag Nestor Arante ang nakuhaan sang indi lisensyado nga armas luthang kag explosives.
Si Sanson naman suno kay Tayaba ang nakuhaan sang loose forearms kag illegal drugs.
Kalabanan sa mga natungdan suno kay Tayaba ang at large pa tubtub subong.
Mas makapaayo na lang suno kay Tayaba nga magsungka na lang ang mga akusado kasunod sang pagpaguwa na sang warrant of arrest.