ILOILO CITY–Gin-athag sang pamunu-an sang National Police Commission (NAPOLCOM) nga limitado lamang ang gahum sang isa ka alkalde may kaangtanan sa pagrelieve ukon pagpili sang mangin chief of police sa isa ka lugar.
Ini ang kasunod sang hingyo sang pamilya Salcedo nga ilisan si S/Insp Asencion Ortizo bilang hepe sang Sara Municipal Police Station.
Sa interview sang Bombo Radyo kay Atty. Joseph Celis, Regional Director sang NAPOLCOM-6, iya ginpahayag nga rekomendasyon gid lamang ang mahimo sang isa ka Local Chief Executive may kaangtanan sa pagpili sang mangin hepe sang isa ka banwa.
Sa pagpaathag ni Celis, ang alkalde ang magapdala sa Provincial Director, City Director ukon Regional Director sang rekomendasyon kun nga-a iga-relieve sa pwesto ang isa ka hepe.
Kun makita nga may yara sang “justifiable reason”, mahimo suno kay Celis nga mapahalin sa pwesto ang isa ka hepe.
Ang Provincial Director, City Director ukon Regional Director naman ang may kinamatarong nga magpili kun sin-o nga mga pulis ang nagakabagay nga pili-an sang isa ka Local Chief Executive nga mangin chief of police.
Samtang, wala sang may nakita nga rason si Iloilo Police Provincial Office (IPPO) Director S/Supt Marlon Tayaba, nga i-relieve sa pwesto ang hepe sang Sara Municipal Police Station.
Ini ang kasunod sang pagdangop sang pamilya Salcedo sa Police Regional Office (PRO) 6 kasunod sang security threat batok kay Police Senior Inspector Asencion Ortizo nga hepe sang Sara PNP.
Sa interview sang Bombo Radyo kay Tayaba, iya ginpahayag nga wala sang rason nga iya i-relieve ukon pahalinon si Ortizo bilang hepe sang Sara PNP bangud maayo ang performance sini bilang hepe sang nasambit nga banwa.
Nagapati naman si Tayaba nga isa ka matarong nga pulis si Ortizo kag wala sang dapat kakulbaan ang pamilya Salcedo.