ILOILO CITY–Walo ka mga tribu ang nagpasundayag kadungan sang Opening Salvo sang Dinagyang Festival 2019 kahapon nga adlaw.
Ang tagsa ka tribu ang nagpakita sang ila maayo kag pinasahi nga performance sa tagsa ka judging area nga ginpahamtang sa syudad sang Iloilo.
Ang walo ka mga tribu nga nagpakigbahin sa Ati Tribes competition amo ang mga masunod:
1.Tribu Panayanon sang Iloilo City National High School
2.Tribu Paghidaet sang Lapaz National High School
3.Tribu Dagatnon sang Ramon Avanceña National High School
4.Tribu Hugponganon (anay Tribu Buntatalanit)
5.Tribu Salognon sang Jaro National High School
6.Tribu Pan-ay sang Fort San Pedro National High School
7.Tribu Barriohanon sang Barrio Obrero National High School
8.Tribu Ilonganon sang Jalandoni Memorial National High School
Sa interview sang Bombo Radyo kay Iloilo City Mayor Jose Espinosa III, ang walo ka tribu ang ginakabig nga “the best” competing tribes.
Magluwas sa walo, may duha man ka non-competing tribes nga nagpakigbahin.
Ginakabig naman sang alkalde nga isa ka madinalag-on nga aktibidad ang ginpatigayon nga Opening Salvo.
Nahibalu-an nga ginpasirado ang kalabanan sa mga dalan sa City Proper Area agud hatagan-ligwa ang Opening Salvo.
Umpisa alas 2:00 kahapon sang hapon, ginpatuman na ang total closure sa City Proper area kag natapos ang aktibidad pasado alas 6:00 sa hapon.