ILOILO CITY–Kuntento ang Iloilo Dinagyang Foundation Incorporated (IDFI) sa nangin performance sang walo ka competing Ati Tribes sa Opening Salvo sang Dinagyang Festival 2019.
Sa interview sang Bombo Radyo kay Robert Alor, chairman sang Ati Tribes Competition, iya ginpahayag nga nagnubo sa walo ang competing tribes samtang duha naman ang non-competing tribes ang nagpakigbahin sa Opening Salvo.
Kun sang nagligad suno sa iya, tama ka damu sang tribu nga nagpakigbahin apang sa subong suno kay Alor, ila nakasugtan nga mas panami-on ang kalidad sang performance sang tagsa ka tribu.
Ginpahayag ni Alor nga lauman pa gid ang manami kag pinasahi nga performance sang tagsa ka tribu sa highlights sang Dinagyang Festival 2019 sa katapusan sang Enero.
Sa ginpatigayon nga Opening Salvo suno kay Alor, iya nakita nga kinahanglan pa nga pasangkaron ang crowd control ilabi na sa Dinagyang Grandstand kag sa iban pa nga judging areas.
Kinahanglan suno kay Alor nga may yara sang matawhay nga alagyan pasulod kag paguwa sa mga judging areas ang mga dancers kag ang props men.