ILOILO CITY–Ginsuspende ni Iloilo City Mayor Jose Espinosa III ang ginapatuman nga liquor ban sa syudad sang Iloilo kadungan sang selebrasyon sang Dinagyang Festival 2019.
Ang nasambit nga anunsyo ang ginhimo mismo ni Espinosa sa atubang sang mga negosyante sa syudad.
Ginpirmahan man ni Espinosa ang temporaryo nga pagpauntat sang Executive Order 146.
Nagakahulugan ini nga umpisa sa Byernes, Enero 25 tubtub sa Lunes sang kaagahon, Enero 28, mahimo nga makabaligya sang makahulubog nga ilimnon sa bars kag sa iban pa nga baligyaan.
Sa pihak sini, nagpangabay man ang alkalde sa mga negosyante nga indi pagpatam-an kamahal ang presyo sang mga ilimnon kag mangin matinahuron sa mga bisita.
Ginakalipay sang mga negosyante sa syudad sang Iloilo ang nasambit nga lihok sang alkalde.
Sa interview sang Bombo Radyo kay Jim Pendon, isa sa mga negosyante sa syudad, iya ginpahayag nga dako gid ng bulig sa ila ang pagpauntat sang liquor ban.
Suno kay Pendon, pat-od nga mangin masadya ang selebrasyon sang Dinagyang bangud wala na sang liquor ban anuman nga oras.
Ginpasalig man sang natungdan nga sundon nila ang mando sang alkalde kabaylo sang suspensyon sang liquor ban.