ILOILO CITY-Sagad na gid sa buto ang away sang magbilas nga sanday Iloilo City Mayor Jose Espinosa III kag Iloilo City Lone District Congressman Jerry Treñas.
Ini matapos nga daw kaangay nga indi na makamitlang si Espinosa sa pangalan ni Treñas sang gin interview sang Bombo Radyo nahanungod sa pagpadulong ni anay Special Assistance to the President (SAP) Christopher “Bong” Go sa Iloilo.
Sa interview sang Bombo Radyo kay Mayor Espinosa, maathag nga ginalikawan sini nga mitlangon ang pangalan ni Treñas sa diin gintawag lang niya ini nga “manong”.
Nahibaluan nga mas nagalala pa gid ang away nanday Treñas kag Espinosa humalin sa isyu sa pulitika tubtob sa indi pag-imbitar sang mamalidha sa Iloilo Dinagyang Festival.
Samtang wala naman napunggan ni Congressman Treñas ang iya nga kaugalingon nga magsabat sa mga isyu nga ginahaboy sa iya sa mga kasumpong sa pulitika partikular si Mayor Espinosa.
Sa interview sang Bombo Radyo kay Treñas, ginpahayag sini nga masami lang ini nga ginahaboyan ukon gina pato-patoan sang isyu sang iya mga kasumpong kaangay na lang sang madamo siya sang girlfriends kag mga anak sa luwas, madamo sang kaso kag madamo sang balatian.
Suno kay Treñas, ginahimo sang iya mga kasumpong sa pulitika ang tanan nga pagpakamalaot bangud nagadumdom ang mga ini nga yara sila sa husto.
Nahibaluan nga na dismaya kag naglain man ang buot ni Treñas matapos nga wala ini gin-imbitar sang Iloilo Dinagyang Foundation Inc (IDFI) ukon sang iya bilas nga si Espinosa.
Dugang pa ni Treñas nga daw kaangay nga ginapamulitika sa subong ang Dinagyang Festival sa baylo nga magtutok kay Sr. Sto Niño.
